Un Bordalés a l’origina deu novèth vin de La Rioja D’après un tèxte de J. Lafitte, transmés per Y. Barreau e qu’estut publicat dens Lo Sarmonèir (2014) apui dens Lo Novèth Sarmonèir (2019)

- Gaby

Lo vinhau de La Rioja, dens lo nòrd d’Espanha, es coneixut coma lo mèi vielh e lo mèi nòble d’aqueth país. Los prumèirs tèxtes que hèsen referéncia a la plantacion de la vinha dàtan deu IXe siègle e la viticultura comencèt a vèner comerciala a la fin deu XIIIe siègle.

Mès conéixen mens l’implicacion d’un Bordalés, pus precisament un Medoquin, dens lo desvolopament deu novèth vin de La Rioja au XIXe siègle, un vin de qualitat superiora.

Aqueth òme èra lo bien-nommat Jean (dit Cadixe) Pineau, neixut en 1823 a Grissac (comuna de Blancafòrt) d’una familha de vinhairons coma ne’n èran soent los Blancafortés en ‘queth temps, que trabalhèvan dens los maines deus grands proprietaris bordalés.

Jean Pineau se botèt a trabalhar au castèth Lanessan (pròixe Sent Gelian), se maridèt en 1845 e vingut lo mèste de chai deu castèth... e lo quite òme de confiéncia deu mèste, lo negociant xartronés Delbos. Fau díser que nòste òme èra un coneixut e sabèva s’i hèser per produíser un vin de bona qualitat larjament exportat. Dísen d’alhors que lo castèth Lanessan auré poscut se trobar dens lo classament deus grands vin de 1855 se M. Delbos avè pas aublidat de transméter a temps sa candidatura e sons escantilhons per concórrer !

Mès vachí qu’arribèt lo mau blanc (l’oidium) que se botèt a gastar lo vinhau deu Medòc. E dens lo même temps, l’Espanhòu – o pulèu lo Basque ? - don Guillermo Hurtado de Amezaga, marqués de Riscal, que vivèva a Bordèu e frequentèva los negociants deus Xartrós, eretèt d’un grand vinhau a Elciego dens la província d’Alava.

Òr los poders publics espanhòus volèvan milhorar los vins de la region en se raproixant de la qualitat reconeixuda deus vins de Bordèu.

Lavetz, en 1862, lo deputat generau provinciau d’Alava hasut passar au marqués de Riscal una demanda de recrutament d’un vinhairon per fin d’introduíser les tecnicas viticòlas bordalesas. Estut botat en relacion demb Jean Pineau, qu’acceptèt la prepausicion d’autant mèi que seré pagat lo triple de çò que toquèva a Lanessan.

Pas aisit d’hèser çanjar los mòdes de produccion ! Pineau s’i hasut a preconisar de plantacions pus prihontas, en règas, demb los xerments ligats a hius per pas que los rasims toquèssin lo sòu, e demb traitaments au sofre e au coire contra les malausias. Au moment de les vrenhas, ensenhèt a desgitar los gruns porrits o braudós. E dens lo chai, ensenhèt a utilisar de barricas bordalesas, entr’autas causas.

Pineau volèva que lo vin estussi pas vendut que 3 ans après la vrenha, mès de proprietaris ec hasúren pas e lo vin estut decebent, e la majoritat deus vinhairons – urosament pas lo marqués de Riscal – dixèt lo progèit. Aquò dit, una escòla de barriqueria dubrit e estut dirijada per lo hilh de Jean Pineau

Lo contrat de Jean Pineau s’acabèt en 1868 mès contunhèt de trabalhar alhors per lo marqués, elevant lo vin qu’avè aperat « medòc alavés », demb totjorn mèi de succès. Se morit en 1889 lunh de son Medòc natau e sons vins contunhèren d’estar recompensats, dinc a obténer en 1895 lo diplòma d’aunor a l’expausicion de 1895 a Bordèu. Adara repausa a Elciego e una avinguda i pòrta son nom !

Voir en ligne : https://soundcloud.com/radio-pais/a...

Un gran de sau ?

(connexion facultative)

  • [Se connecter]
  • Pour créer des paragraphes, laissez simplement des lignes vides.

Ajouter un document

Dans la même rubrique :


 

Sommaire Noms & Lòcs