Los purmèrs chècs que vedom, qu’èra dab lo tabac. Que los portàvam a lo Hartaneròt que s’aucupava de lo Crèdit Agricòla. Lo milhòc, ne lo venèvam pas. Qu’èra entà neurir la poralha, lo pòrc. Lo purmèr còp que’n vendom, que’n avèvi dètz-e-sèt sacs qu’avèvi desquilhat a la man au som de lo solèr. Lo tabac que hasó lo bonaür de hèra de paisans.
Ací, que venèvam tanben mongetas, quate o cinc pòrcs i los vetèths. Los hitges gras, qu’èran entà las hemnas. Los òmis n’avèvan pas arren a i véder ! Dab lo produit de la venta de los ueus, que crompèvan la especieria de la setmana e sovent que tornavan sòus.
En çò de Hrancòla, que hasèvan la collècta deus ueus. Un còp, qu’èran tornats de la virada dab quate cents dotzenas !

Autes còps, que podèvam passar ua annada completa sens véner arren, en se privar a pena.

Ne pagàvam pas impòsts e que hasèvam la manòbra (entertien de las vias comunaus, varats, ponts...). Que ns’indicavan on calèva curar lo varat, portar calhaus qui anàvam cuélher au « Lasset ». Lo men pair que’us brisava a marteradas, sustot quan èra en colèra. Qu’èra la sua faiçon de’s liberar.
Un còp, que vienèvi de’m blaçar au rugbi. Vedent lo men pair a brisar calhaus, lo panissèr que’u demandà :
« çò qu’arriba ? »
« Laurenç que s’a brisat la rea au rugbi ».
Lo vrèspe, qu’avoi visitas per’mor lo bronit qu’avèva corrut qu’èri gravament blaçat.
Entà la manòbra, que portàvam tanben gravièr mes « lo mètre cubic » n’ac hasèva pas sovent !

Tèxte : la Maria & lo Laurenç Gracianetas
Arrevirada : la Maria Elena Puei Dicard & lo Patric Colinet