(lecture d’un extrait par Garluche ; voir aussi sa contribution dans le forum associé)
Ací qu’atz un conde arrecaptat per Arnaudin. Tà jo, qu’es un deus mèi beròis, dab ua lenga natra e blossa com ne l’audéixenn pas mei enlòc uei.
Un còp qu’i avè un aulhèr de Taulada dond barrèva en ua bòrda de Bombèt. Le bòrda de Bombèt, uei n’i es pas mèi, qu’èra lahòra a bisa deus tucs, pròixe d’un pradèu.
Aqueth aulhèr qu’èra un gojat un chic sus eth, e que sabè quitament un chic léger. « Ne vòs pas har ’stancs ni parligòis dab los qui te vàlenn, ce’u disènn los auts aulhèrs, qu’auràs totun autant de lagasts. » Mès eth, ne maglèva pas de har lo son camin.
Sàbetz, qu’èra un disedeir, d’auts còps, que s’entinè harda devath lo tuc de Bombèt. E l’aulhèr, en guardant, qu’ic avè mantuns còps ’sprubat ; deus uns còps, gri-gri-gri, s’entinè, com se hadènn arringar los tèsts ; d’auts còps qu’entinè com de bèths ’scargalhs d’arríder, o unqüèra le gènt com se’s passegèvann suu lapar : plim-plam, plim-plam…E ce pensèva mantuns còps, pas xetz por totun : « Que vorrí bienn véder lo nid d’aquiras múuras… » E qu’èrann lèu a miei estiu…qu’aubrívann le neit.
Un desser, l’aulhèr qu’arriba a le bòrda e, un còp lo ligòt aviat, que se’n va s’assèder suu cim deu tuc. Aquí que’s tira un líber deu sarron e que’s bota a léger. E léger, e léger, e léger…E, a grands pausas, qu’arreborèva los lugans.
Entà enlòra, de cap a mieineit, lo tuc que se’u hènn en dus tròç davant eth. E que va entèner ua vutz de hemna que disè : « Mainada, va véder çò que s’i despassa suu tuc. » Ua mainada que puja :
– Mair, ce ditz, que vei un aulhèr asseitat sus un bossòc de bròc.
– Ditz-lo que dravi ençà, ce ditz le vutz, e n’agi pas nada por que lo son ligòt qu’ani a mau.
Le dòna que torna pujar :
– Pastor, ce ditz, que dívetz vir entà nòste gènt, e n’àgitz pas por que lo ligòt qu’ani a mau.
– Ne mòrenn pas qu’un còp, ce’s pensa eth, e jo que vui véder aquò bè !
E que drava. Talèu entrat, lo tuc que’s torna barrar. Trrr ! Aquò que’u podè, e qu’arreborèva hòrt de cap en haut.
– Seguitz-me, ce ditz le mainada, digun ne’vs harà pas arré.
Qu’arriba suu larèr d’un ostau tan bèth, tan bèth ! Se’n podè pas carar ; aquí miralhs, aquí tèsts, aquí vaixèths, e harda de l’un estrem, e harda de l’aut : que n’avè los uelhs enterlusits. Tot qu’èra esclet, tot que lusiva com le bèra aiga au só.
En un miralh, lo gojat que vedot ua lana prohonta, hensa, dab aulhèrs dond se virolegèvann tot chancats capvath lo tèmps au darrèr deus ligòts ; que vedè aquò com s’estossi estat sus Tèrra.
Puix que vedot un gart de hemnas que se n’arridènn de cap ad eth, mès tan bròias e tan bèras, qu’èra un plaser d’ic véder. Que n’i avè ua, tota joena, qu’avè suu púu ua corona trenada de bròc e de jauga eslorida.
– Pastor, ce dixot, assèita-te. Qu’i a aquí de qué te har passar le hami e l’adromir. N’agis pas songe de les toas aolhas, n’ann pas daune de tu entà se guardar.
E les hadas que’u servírenn un desprèr, hardas a hinda-handa, que jamèi n’avè gostat de tan bona.
– Òh ! ce’s pensa eth, que m’arrepasterèi totun un còp, bè, o mau i aurà.
Quand estot hart, les hadas que’u mièrenn en un leit tan bèth, s’i gausèva pas ’jacar.
– Aquò n’es pas mèi lo jaç de le bòrda, ce’s pensa, ne m’i carquerèi pas lagasts !
E que s’adromit. Quand estot desvelhat, que’s tornèt botar a léger, e léger, e léger, hentz lo son líber, tant dinc a qui hadot aubrir lo tuc. E que se n’anot.
Lo son ligòt qu’èra ond l’avè dixat, hart tant com podè n’estar e xetz nat cap a díser.
E pardí ! Desempuix que sabot aqueth camin que’n gahèt l’agrilh. Aquí dehentz, qu’i avè ua hada tota joena e bròia, bròia a s’i miralhar. De tant har que cadórenn amics. D’aquò en avant que vinot desgais se’u vedènn suu plèr de le lana. « E t’estujas donc tu ? ce hadènn los auts aulhèrs, que’t pèrdem a ringlants jorns. » Mès perdiquejar que podènn, iths, aquò que n’avènn. Que guardèva dehèt unqüèra, mès vestit miélher qui no pas arrés, e piaucs a tota man. Lo son ligòt que hadè bonas, e s’a díser i avè, miélher qui nat aut, jamèi les soas aolhas ne’s barregèvann pas, qu’eth qu’i estossi o no ; se hadènn cap en d’auts ligòts, que virèvann d’iras avant, o de betot que trauquèvann xetz barrei. Tot aquò que hadè har parligòis ; qu’i avot dus aulhèrs, mèi hinhènts qui no pas los auts, dond volórenn saber çò que n’èra, e que’u guaitèrenn. Un desser que’u vedórenn que s’espanèva de cap au tuc de Bombèt ; e s’ahinar, e s’ahinar, e iths lo seguir aus traslais ; de l’un teit a l’aut qu’arribèrenn tot dòi entau véder s’engolar hentz lo tuc. N’i avot pro entà qui lo lendoman, davant só-salhit, aulhèrs, crabèrs, vaquèrs que’n gitèssinn los « Diumadau ! » de Cantagrith a Le Bohèira..
Mès quand l’aulhèr volot tornar a le maison de les hadas, lo tuc ne maglè pas mèi-vit qu’un troc ; que damorèt com davant èra e com es desempuix tostèm damorat, un piòu sablut, pedaçat de bròc e de sarpoth, dab un camin tot blanc. E qu’avot bèth gitar plors, jamèi n’i tornèt entrar. Praube qu’èra estat, praube que tornè vir. E per’quò, ne volot pas jamèi salhir d’aquera guarda, tant peinud que’u dèssinn lo pan. Atau que hadot le soa vita l’aulhèr de Bombèt, lunh deus òmis e de tots, xetz jamèi se maridar. Ne hadè pas ’stancs dab arrés, n’avè pas d’aut jaç ni d’aut larèr qui l’ostalet de le bòrda. Que’u vedènn le neit, a lutz de luvèira, ce disènn, viardar capvath le tucolèira e trucar dab lo pau chanquèr sus le sòla de le tèrra com un gènt dond vòu har aubrir ua pòrta.